Nakapagkit sang pagnubo kag nagtibusok sa pinakamanubo nga lebel sa sulod sang siyam ka bulan ang padala nga kwarta sang mga Overseas Filipino Workers (OFW) sang bulan sang Pebrero, apang nagapabilin nga mas mataas gihapon ang kabug-usan nga pondo nga nasulod sa pungsod subong nga tuig.
Base sa datos sang Bangko Sentral ng Pilipinas nga ginpagwa sang Miyerkules, naglab-ot lang sa $2.786 bilyon (₱167.08 bilyon) ang cash remittances ukon mga padala nga nag-agi sa bangko sang Pebrero.
Mas manubo ini kumpara sa $3.020 bilyon (₱181.11 bilyon) sang Enero.
Ini na ang pinakamanubo nga lebel halin pa sang Mayo 2025, bisan pa nga mas mataas ini kumpara sa $2.716 bilyon nga napagkit sang Pebrero sang nagligad nga tuig.
Sa kabug-usan nga remittances sang amo nga bulan, $2.25 bilyon ang halin sa land-based workers, samtang $0.53 bilyon naman ang gin-amot sang sea-based workers.
Bisan sang pagnubo sang Pebrero, ginpahayag sang BSP nga naglab-ot gihapon sa $5.806 bilyon (₱348.19 bilyon) ang year-to-date cash remittances sa una nga duha ka bulan sang tuig kun sa diin mas mataas kumpara sa $5.633 bilyon sa kasubong nga tion sang 2025.
