SULTAN KUDARAT, MAGUINDANAO DEL NORTE — Mariing kinondena ng 6th Infantry Kampila Division at Joint Task Force Central (JTFC) ang itinuturing nilang “duwag at hindi katanggap-tanggap na uri ng karahasan” matapos ambushin at mapatay ang dalawang off-duty na kawal noong gabi ng Setyembre 23, 2026.
Kinilala ang mga nasawing biktima na sina Private First Class (PFC) John Mark Dumaguing at PFC Jobert Labuson, na kapwa mga miyembro ng Bravo Company ng 7th Infantry (Tapat) Battalion.
Ayon sa paunang imbestigasyon ng pulisya, naganap ang pamamaril bandang alas-6:10 ng gabi sa kahabaan ng Davao-Cotabato National Highway sa Barangay Ladia, Sultan Kudarat, Maguindanao del Norte.
Magkaangkas sa isang motorsiklo ang dalawang sundalo para bumili sana ng pagkain nang bigla silang buntutan at pagbabarilin ng dalawang hindi pa nakikilalang suspek na lulan din ng isa pang motorsiklo (riding-in-tandem). Nagtamo ng mga seryosong sugat sa katawan ang mga biktima mula sa pinaniniwalaang caliber .45 na baril, base na rin sa tatlong basyo ng bala na narekober ng mga awtoridad sa crime scene.
Mabilis pang naisugod ng kanilang mga kasamahan at emergency responders ang dalawang kawal sa Cotabato Regional and Medical Center sa Cotabato City, subalit kalaunan ay binawian din sila ng buhay.
Sa isa namang opisyal na pahayag, nagpaabot ng taos-pusong pakikiramay si BGen. Ricky P Bunayog PA, ang Acting Commander ng 6ID/JTFC, sa pamilya, mga mahal sa buhay, at mga kasamahan sa serbisyo ng mga nasawing “soldier-patriots”. Binigyang-pugay naman ni Col. Romeo N. Bautista III, ang Acting Brigade Commander ng 602nd Infantry Brigade, ang katapangan at sakripisyo ng dalawa na aniya ay mananatiling bahagi ng marangal na kasaysayan ng Hukbo.
Naka-red alert na ngayon ang mga awtoridad habang nagpapatuloy ang manhunt operation ng Sultan Kudarat Municipal Police Station at ng militar upang matukoy ang motibo at maaresto ang mga salarin upang madala sila sa hukuman ng hustisya. Kasabay nito, nanawagan ang pamunuan ng 6ID sa publiko na manatiling mapagmatiyag at makipagtulungan sa pamamagitan ng pagbibigay ng anumang impormasyon na makatutulong sa kaso.
