Nagpabakod sang seguridad ang Koronadal National Comprehensive High School kasunod sang mga concern nahanungod sa safety sang mga estudyante kag personnel.
Sa interview sang Bombo Radyo Koronadal, ginpahayag ni Assistant Principal for Operations and Learners Support Sonny Pama nga gindugangan na ang mga security guard nga nagabantay sa entrance sang eskwelahan.
May yara man sang metal detectors nga ginagamit sa pag-check sang mga bag sang mga estudyante antes sila makasulod sa classroom areas.
Kabahin man sang ginpatuman nga measures ang pag-regulate sang pagsulod sang mga salakyan sa school premises, ilabi na kon indi kompleto ang mga kinahanglanon nga dokumento.
Samtang, ginaplano man sang school administration nga ipatuman ang mas istrikto nga policy para sa mga ginikanan. Sa palaabuton nga Parents-Teachers meeting, pagatalakayon ang patakaran nga ang mga transaksyon sang ginikanan himuon na sa gwa sang school entrance.
Ginpahayag ni Pama nga may designated school personnel nga mag-assist sa mga ginikanan nga may kinahanglan nga transaksyon, agud mapadayon ang seguridad samtang ginahatagan gihapon sang serbisyo ang mga ginikanan.
