Nagapokus ang lokal nga panguluhan sang Banga, South Cotabato, sa pagpalig-on sang seguridad sa mga eskwelahan kag pagpugong nga maka-access ang mga kabataan sa mga armas matapos ang shooting incident sa Banga National High School.
Sa interview sang Bombo Radyo Koronadal ginpahayag ni Banga Mayor Boyet Palencia, 11 ang kabug-usan nga biktima sang insidente, kun sa diin tatlo ang napatay kag walo ang nasamaran. Lakip sa mga napatay ang ginatudlo nga suspek.
Suno sa alkalde, wala sang naglungtad nga away ukon komprontasyon sa tunga sang suspek kag mga biktima antes ang pagpangluthang, base sa inisyal nga imbestigasyon.
Padayon naman nga ginatan-aw sang kapulisan ang motibo kag iban pa nga sirkumstansya nga nagdul-ong sa insidente.
Lakip sa ginatan-aw nga aspeto amo ang access sang suspek sa armas nga ginatago sa ila panimalay. Suno kay Palencia, nakuha ang pusil halin sa ginatagoan sini sa ila balay kag nadala sa sulod sang eskwelahan.
Bangud sini, nagpanawagan ang alkalde sa mga tag-iya sang armas nga siguruhon ang husto kag luwas nga pagtipig sang mga pusil, ilabi na sa mga panimalay nga may kabataan.
Dugang pa ni Palencia, ginaduso man sang LGU ang mas istrikto nga seguridad sa sulod sang mga eskwelahan, lakip ang mas hugot nga pag-inspeksyon sa mga estudyante kag paggamit sang mga pamaagi ukon kagamitan nga makabulig sa pag-detect sang armas sa school premises.
Samtang, gin-cancel sang LGU Banga ang klase sa mga pampubliko kag pribado nga eskwelahan matapos ang insidente. Ginapaabot man ang meeting ni Palencia upod sa mga school heads agud talakayon ang dugang nga safety measures kag mga paagi agud malikawan ang pagbalik sang kaangay nga insidente.
Ginpahayag sang LGU Banga nga magabulig ini, upod ang provincial government kag congressional office, sa mga biktima kag ila mga pamilya, ilabi na sa pag-atipan sa mga nasamaran.
Nagpanawagan man si Palencia sa mga ginikanan nga tutukan ang ila mga kabataan, lakip ang ila mga ginatan-aw kag ginakonsumo sa social media, samtang ginapadayon sang mga otoridad ang imbestigasyon sa posible nga mga kabangdanan kag impluwensya nga may kaangtanan sa insidente.
