“Kun ano ang maayo, didto ta. What is right is right, what is wrong is wrong.”
Amo ini ang matigdas nga panindugan ni Tatay Agosto Pastor, isa ka residente kag tricycle driver sa Syudad sang Koronadal, sa interview sang Bombo Radyo Koronadal.
Suno kay Tatay Pastor, dapat sundon sang Senado kag sang gobyerno ang mga probisyon sang Konstitusyon, ilabi na sa proseso sang impeachment.
Ginpahayag niya nga indi dapat pagbalion sang mga senador ang nakasulat sa Konstitusyon kag dapat ipatuman ang two-thirds nga boto ukon 16 ka boto para sa conviction kay Vice President Sara Duterte.
Dugang pa niya, kinahanglan man nga mapanabat ang tanan nga opisyales sang gobyerno nga may ginahimo nga paglapas kag indi lamang magpokus sa isa ka opisyal pareho kay VP Sara.
Samtang, halin sa isyu sang impeachment, ginpabutyag man ni Tatay Pastor ang iya panawagan sa gobyerno nga magpatuman sang epektibo nga mga tikang batok sa nagapadayon nga pagsaka sang presyo sang mga baraklon kag gatong.
Suno sa iya, importante nga mahatagan sang bulig ang mga ordinaryo nga mamumugon, ilabi na ang mga driver nga direkta nga apektado sang pagsaka sang presyo sang gatong.
Gindugang niya nga kinahanglan magpatuman ang gobyerno sang mga solusyon nga makapahagan-hagan sa palas-anon sang mga driver kag iban pa nga sektor nga apektado sang pagsaka sang presyo sang produkto petrolyo.
