Nagpasalig ang Department of Social Welfare and Development (DSWD) nga padayon kag indi lamang temporaryo ang ihatag nga suporta sa mga estudyante kag pamilya nga naapektuhan sang insidente sa Banga National High School.
Suno kay DSWD Secretary Rex Gatchalian, lakip sa intervention ang medical kag financial assistance, psychological support, kag long-term nga programa para sa mga pamilya nga nagakinahanglan sang padayon nga bulig.
Ini ang iya ginpahayag sa interview sa Bombo Radyo Koronadal matapos niya personal nga ginbisita ang mga pamilya kag estudyante nga nagapadayon sa pagpaayo.
Suno kay Gatchalian, kabahin ini sang mandato ni Presidente Ferdinand “Bongbong” Marcos Jr. nga masiguro nga makabaton sang nagakaigo nga suporta ang tanan nga apektado.
Para sa mga pamilya nga may casualties, posible man ang burial assistance kag economic assistance agud mabuligan sila sa pag-atubang sa epekto sang insidente kag sa ila pagbangon.
Ginpahayag ni Gatchalian ang iya simpatiya sa mga apektado nga pamilya kag ginsiguro nga magapadayon ang suporta sang gobyerno samtang ginaproseso ang ila mga kinahanglanon.
