Ginkuwestyon ni Davao City 1st District Representative Paolo Duterte ang konstitusyonalidad sang desisyon sang Senate Impeachment Court nga bag-uhon ang voting threshold para sa conviction kay Vice President Sara Duterte.
Suno kay Duterte, indi buot silingon nga mangin constitutional na ang isa ka interpretasyon bangud lamang nakakuha ini sang majority vote.
Ginpunto niya nga sa 1987 Constitution, kinahanglan ang concurrence sang two-thirds sang “all the Members of the Senate” para sa conviction.
Gani, suno sa kongresista, mahimo ini mangin constitutional question kag dapat nga ang Supreme Court ang magdesisyon kun ang interpretasyon sang Senado nagasanto sa Konstitusyon.
Samtang, ginpahayag sang defense team ni Vice President Duterte nga posible man nila ipasang-at sa Supreme Court ang isyu, apang kinahanglan anay ini nga talakayon kaupod ang bise presidente.
