Nagapati si Edwin Dequiña, isa ka tricycle driver sa syudad sang Koronadal, nga importante ang patas kag husto nga pagdumala sang impeachment proceedings batok kay Vice President Sara Duterte.
Sa interview sang Bombo Radyo Koronadal, ginpahayag ni Dequiña nga para sa iya, wala pa sang igo nga basehan agud ma-impeach ang Bise Presidente.
Gindugang pa niya nga posible nga may kaangtanan sa pulitika ang ginapangatubang nga reklamo batok kay Duterte, bangud sa iya pagtan-aw ginakontra ini sang mga kalaban sa politika.
Suno pa kay Dequiña, mas maayo kun personal nga mag-atubang si Vice President Sara Duterte sa impeachment trial agud mabaton niya ang kahigayunan nga ipahayag ang iya sabat kag mapakita ang iya depensa.
Bangud sini, nagpanawagan siya sa mga nagadumala sang impeachment proceedings nga mangin patas kag nagpahayag sang iya handom nga indi magresulta sa impeachment ang nagahilapit nga trial.
