Ginbalibadan sang International Criminal Court (ICC) ang hingyo sang kampo ni anay President Rodrigo Duterte nga obligahon ang pagbutang sang “expert verification reports” sa open-source kag user-generated evidence nga ginapasa sa tribunal.
Ginhangyo sang defense team nga amyendahan ang e-court protocol sang ICC kag idugang ang “expert verification” sa isa ka metadata field sa electronic discovery system sang Registry sang korte.
Sa pito ka pahina nga desisyon nga may petsang Setyembre 27, ginpahayag sang Trial Chamber III nga mahimo ini magresulta sa indi kinahanglanon nga pagpaantala sang pagsugod sang paglilitis bangud sa kadamuon sang ebidensya nga kinahanglan repasuhon.
Suno sa Chamber, mahimo matubag ang kabalaka sang depensa paagi sa yara na nga proseso, diin mahimo kuwestyunon sang mga partido ang admissibility ukon iban pa nga pamantayan sang ebidensya sa tion nga ini ginapasa ukon gilayon pagkatapos matukiban ang isyu.
Ginalauman nga magsugod ang paglitiga ni Duterte sa ICC sa Nobyembre 30.
