Gin-admiter ni Bernard Bolanio, Consultant to Operations sang Yellow Bus Line Inc., nga daku man ang epekto sa ila kumpanya sang padayon nga pagsaka sang presyo sang petrolyo.
Sa interview sang Bombo Radyo Koronadal kay Bolanio, iya ginpahayag nga halos doble na ang kasamtangan nga presyo sang petrolyo kumpara sa nagligad nga presyo.
Bangud sini, kinahanglan man sang kumpanya nga magpatuman sang pagpasaka sang pamasahe agud masustiner ang operasyon kag mga panginahanglanon sang ila mga empleyado.
Kaangot sini, ginapangabay ni Bolanio ang gobyerno nga maghimo sang mga tikang agud mabuligan indi lamang ang mga pasahero kundi lakip na ang mga yara sa transport sector nga direktang apektado sang padayon nga pagsaka sang presyo sang gatong.
Suno sa iya, kinahanglan ang suporta kag nagakaigo nga tikang sang gobyerno agud mabuligan ang transport groups sa pag-atubang sang epekto sang pagsaka sang presyo sang petrolyo.
