Ginaduso sang Department of Energy (DOE) ang suspensyon sang excise tax sa Liquefied Petroleum Gas (LPG) kag kerosene kasunod sang pagpagwa ni Pangulong Ferdinand R. Marcos Jr. sang Executive Order No. 125-2026 nga nagalakat sa temporaryo nga pagtanggal sang buwis sa pila ka importante nga produkto petrolyo.
Ini matapos ginreport sang ahensya nga naglab-ot sa US$99.41 kada bariles ang average nga presyo sang Dubai crude oil sa sulod sang isa ka bulan.
Mas mataas ini sa US$80 threshold nga yara sa idalom sang Republic Act No. 12316, nga nagakabig sini bilang “critical condition” sa sektor sang petrolyo.
Bangud sa ginaduso nga suspensyon sang buwis, mabuhinan sang P3.36 kada kilo ang excise tax sa LPG, ukon katumbas sang P36.96 nga tipid para sa isa ka 11-kilogram nga LPG cylinder.
Samtang, P5.60 kada litro naman ang posible nga mabuhin sa excise tax sang kerosene.
Tuyo sang tikang nga mahagan-hagan ang gasto sang mga pumuluyo, ilabi na ang mga panimalay, sa tunga sang padayon nga pagsaka sang presyo sang petrolyo sa international market.
Suno sa DOE, kabahin ang LPG kag kerosene sa regular nga mga kinahanglanon sang madamo nga pamilya kada bulan, gani ginakabig nga importante ang paghatag sang temporaryo nga tax relief sa sini nga mga produkto.
