Patay ang duha ka off-duty nga soldado sang 7th Infantry (Tapat) Battalion matapos ginluthang sang mga suspetsado nga nagasakay sa motorsiklo mga alas 6:10 sang gabe sang Setyembre 23 sa Davao-Cotabato National Highway sa Barangay Ladia.
Ginkilala ang mga biktima nga sanday PFC John Mark Dumaguing kag PFC Jobert Labuson nga lunsay katapo sang Bravo Company sang 7IB. Sakay ang mga ini sa motorsiklo kag mabakal kuntani sang pagkaon sang gintambangan sang duha ka mga suspetsado kag ginluthang.
Sa interview sang Bombo Radyo Koronadal ginpahayag ni Lt Col Ronald Suscano ang tagpamaba sang 6th Infantry Division nga ang mga shell casings nga narekober sa crime scene nagapakita nga .45 caliber pistol ang gingamit sa pagpangluthang. Gilayon nga gindala sa Cotabato Regional and Medical Center ang mga biktima apang lunsay ginbawian sang kabuhi bangud sa ila mga pilas sa kalawasan.
Ginpahayag ni Suscano nga padayon ang imbestigasyon sang Philippine National Police (PNP) agud mahibaluan ang motibo kag identity sang mga suspetsado, sa diin ginalauman ang resulta sa sulod sang isa ka semana. Wala man ginadula sang Armed Forces of the Philippines (AFP) ang posibilidad nga ang insidente may kaangtanan sa gun-for-hire activities kag presensya sang loose firearms sa lugar.
Ang mga awtoridad yara sa red alert, kag ang isa ka tingub nga operasyon sa pagpangita sang pulis kag militar nagapadayon. Nag-apelar ang 6ID sa publiko nga maghatag sang anuman nga impormasyon nga makabulig sa pagkilala kag pagdakop sa mga naghimo sang krimen.
