Posible nga magbag-o ang two-thirds voting threshold sa impeachment case batok kay Vice President Sara Duterte kon makabalik kag makapartisipar sa proceedings ang apat ka senador nga wala nakatambong sa nagligad nga mga hearing, suno kay Atty. Antonio Bendita.
Sa interview sang Bombo Radyo Koronadal, ginpahayag ni Bendita nga kon kompleto ang 24 ka senador sa tion sang final voting, 16 ka boto ang kinahanglan para sa conviction.
Ang apat amo sanday Sen. Ronald “Bato” dela Rosa, Sen. Jinggoy Estrada, Sen. Rodante Marcoleta kag Sen. Loren Legarda. Madumduman nga si Senador Dela Rosa naga panago bangud sa ICC arrest warrant, sanday Senador Estrada kag Senador Marcoleta na detained sa mga kaso nga ginahukman sa Sandiganbayan, samtang si Senador Legarda yara sa extended medical leave abroad.
Apang ginpunto niya nga kinahanglan gihapon nga may sakto nga kahibalo ang mga senator-judge sa mga ebidensya kag testimonya antes magdesisyon.
Suno kay Bendita, nga para sa mga senador nga wala nakatambong sa pila ka hearing, mahimo nila repasuhon ang mga rekord, apang indi na nila personal nga makita kag mabatian ang mga testigo.
Dugang ni Bendita, nga mahimo man ikonsiderar sang isa ka senator-judge ang abstention ukon inhibition, depende sa legal kag personal nga konsiderasyon.
Sa bahin sang ebidensya, ginpahayag niya nga mahimo mangin mabug-at ang documentary evidence kon nagakontra ini sa testimonya sang witness, ilabi na kon yara mismo sa official record ang dokumento.
Padayon pa ang presentasyon sang prosecution sang ila mga testigo kag ebidensya antes magpresentar ang depensa kag magdesisyon ang mga senator-judge.
