Posible nga may impluwensya ang pulitika sa desisyon sang pila ka senator-judges sa nagapadayon nga impeachment trial ni Vice President Sara Duterte.
Ini ang nangin pahayag ni Denmark Suede, Bombo International News Correspondent to Australia, sa interview sang Bombo Radyo Koronadal.
Suno kay Suede, ang nagahilapit nga 2028 national elections mahimo magdul-ong sa pila ka mga senador nga may plano magpadalagan nga ikonsiderar ang pulitikal nga epekto sang ila mga desisyon sa impeachment trial.
Suno sa iya, bangod ang mga senador amo man ang nagaserbe bilang senator-judges, indi malikawan nga may mga obserbasyon kag pagpangduhaduha gikan sa publiko may kaangtanan sa posible nga bias sa ila paghusgar.
Ginpahayag man niya nga bisan may mga kamatuoran kag ebidensya nga ginapresentar sa impeachment court, may pila ka senator-judges nga padayon nga nagapanindugan sang ila posisyon, kag ginhimo bilang ehemplo si Senator-Judge Robin Padilla.
Apang ginpabutyag ni Suede nga dapat sa gihapon magpabilin nga nakabase sa ebidensya kag sa mga isyu nga may direkta nga kaangtanan sa kaso ang pagdesisyon sang impeachment court agud mapabilin ang kredibilidad sang proseso.
