Nagpaandam ang Office of the Civil Defense–Negros Island Region (OCD-NIR) sa posible nga pagdaludo sang lahar halin sa Bulkang Kanlaon kasunod sang moderately explosive eruption sini sang Sabado.
Sa interview sang Bombo Radyo Bacolod, ginpahayag ni OCD-NIR Director Donato Sermeno III nga mataas ang posibilidad sang lahar flow kon mag-ulan pagkatapos sang pag-alisngaw sang bulkan.
Bangud sini, ginpahugtan pa sang ahensya ang pagmonitor sa palibot sang bulkan.
Apang, gin-athag sang opisyal nga bisan may pag-ulan kag masunod-sunod nga pagbuga sang abo, wala pa sang na-record nga mud ukon lahar flow sa Binalbagan River kag Ibid Creek sa banwa sang La Castellana.
Samtang, nakabatyag sang madamol nga ashfall ang pila ka lugar sa Negros Occidental, lakip ang Don Salvador Benedicto, mga mataas nga barangay sang La Castellana, kag ang mga syudad sang La Carlota kag Bago.
Agud masiguro ang kaluwasan sang mga residente, magapatigayon ang OCD-NIR sang aerial drone survey sa mga waterways sa palibot sang bulkan.
Susihon sini kon may mga nagtipon nga debris nga mahimo magbara sa agos sang tubig kag magtuga sang artificial dam, nga posible magresulta sa makahalalit nga flash flood.
Ginapaalintunan ang mga residente nga magpabilin nga alerto kag magsunod sa mga pahibalo sang mga awtoridad, ilabi na kon mag-ulan sa mga lugar nga malapit sa bulkan kag sa mga suba nga posible agyan sang lahar.
