Ginklaro ni South Cotabato Governor Reynaldo Tamayo Jr. nga bisan nagtubo sang 10.7% ang sektor sang mining and quarrying sang 2025, dako gihapon ang kontribusyon sang agrikultura kag pangisdaan sa pagtubo sang ekonomiya sang probinsya.
Base sa datos sang Philippine Statistics Authority (PSA), nag-abot sa ₱157.89 bilyon ang GDP sang South Cotabato sang 2025, nga nagarepresentar sang 6.6% nga pagtubo.
Mas manubo ini kun ikumparar sa 7.0% nga pagtubo nga natala sang 2024.
Sa bahin sang kontribusyon sa ekonomiya, nanguna ang services sector nga may 48.8%, ginsundan sang industry sector nga may 26.5%, kag agriculture, forestry, and fishing nga may 24.7%.
Magluwas sa mining and quarrying, nagrekord man sang pagtubo ang wholesale and retail trade nga may 9.8%, public administration and defense nga may 9.4%, kag financial and insurance activities nga may 7.5%.
Madumduman nga may pila ka grupo halin sa pribado nga sektor, lakip ang lokal nga gobyerno sang Tampakan, nga nagpahayag sang pagsupak sa mga operasyon sang pagmina kag nagpanawagan nga ipasira ang mga minahan sa South Cotabato.
