Preparado na ang House Prosecution Panel nga atubangon kag usisaon ang mga testigo nga ipresentar sang kampo sang depensa sa nagapadayon nga impeachment trial batok kay Bise Presidente Sara Duterte.
Ginpahayag ni Atty. Hez Montalan, deputy spokesperson sang prosecution panel, nga preparado ang ila grupo sa pagpatigayon sang cross-examination agud usisaon ang kredibilidad sang mga testigo kag ang kaangtanan sang ila mga pahayag sa mga alegasyon batok sa bise presidente.
Dugang pa ni Montalan, preparado man ang prosekusyon nga maghain sang mga objection batok sa mga pamangkot ukon argumento nga kuwestiyonable kag wala nagasunod sa mga pagsulundan sang impeachment proceedings.
Ginalauman nga mangin importante ang masunod nga bahin sang paglitiga bangud usisaon diri ang balido nga mga ebidensya kag testimonya nga ipresentar sang duha ka kampo.
Ginpaathag man sang opisyal ang importansya sang pagsunod sa mga patakaran sang impeachment court agud masiguro ang patas kag matinlo nga proseso sa paghibalo sang kamatuoran parte sa kaso.
