Ginkumpirma sang isa ka Pinay correspondent sa Panama nga wala sang Pilipino nga naiulat nga napilasan ukon nadulaan sang puluy-an sa nagluntad nga linog sang nagligad nga Biyernes, oras sa nasambit nga pungsod.
Ini ang ginpahayag ni Chloe Gonzalez, Bombo International News Correspondent to Panama, sa interview sang Bombo Radyo Koronadal.
Suno kay Gonzalez, wala siya sang nabalitaan nga mga Pilipino nga nakaagom sang halit ukon nadulaan sang puluy-an bangud sang linog.
Ginpahayag man niya nga bisan wala sang embahada ang Pilipinas sa Panama, may mga ahensya sang gobyerno sang Pilipinas nga nagapalab-ot sang bulig sa mga Pilipino kag iban pa nga apektado sang linog.
Kaangot sini, gin-agda ni Gonzalez ang publiko kag gobyerno nga padayon nga kamustahon kag chekyaron ang kahimtangan sang mga himata kag mga Pilipino nga nagaestar sa Panama agud masiguro ang ila kaluwasan kag mahibaluan kun may kinahanglan sila nga bulig.
