Padayon ang preparasyon sang Provincial Government of South Cotabato agud maatubang ang posible nga epekto sang Super El Niño, ilabi na sa sektor sang agrikultura kag pangabuhian sang mga mangunguma.
Ginpahayag ni South Cotabato Governor Reynaldo Tamayo Jr. nga nagapadayon ang mga tikang sang probinsya agud maminusan ang posible nga epekto sang tuman nga tagtuyot sa mga uma, talamnan sang utan, kag iban pa nga mga produkto sang agrikultura.
Suno sa gobernador, nakapanagtag na ang provincial government sang libre nga mga binhi, abuno, kagamitan sa pagpanguma, kag pinansyal nga bulig agud masuportahan ang mga mangunguma kon maglala ang epekto sang tag-ilinit sa ila mga pananom.
Dugang pa ni Tamayo, ginhimo man nga mga earth dam ang pila ka suba agud makatigom sang tubig nga mahimo magamit sang probinsya, ilabi na sa paghatag sang suplay sang tubig para sa mga uma.
Samtang, ginpahayag sang gobernador nga wala pa sang dako nga epekto ang sobra nga kainit sa probinsya bangod may panalagsa pa nga pag-ulan.
Bangud sini, nagapati siya nga indi pa masyado naapektuhan ang mga mangunguma kag ila mga pananom.
Bisan pa sini, ginpasiguro ni Tamayo nga padayon ang pagpanghanda sang probinsya agud mangin preparado sa posible nga paglala sang tag-ilinit kag maproteheran ang pangabuhian sang mga mangunguma sa South Cotabato.
