Posible maglab-ot sa halos P1.18 bilyon kada bulan ang madula sa gobyerno sa ginhimo nga desisyon sang National Food Authority Council nga ibaligya sa P29 per kilo ang daan na nga rice stocks pinaagi sa Kadiwa stores, suno sa Federation of Free Farmers.
Suno kay FFF national manager Raul Montemayor, ang NFA kinangalan mag-subsidize sang P6 kada kilo ukon P414 million kada bulan agud maserbisyuhan ang 6.9 milyon ka households kun ang palay mabakal sang P23 per kilo, ukon P1.18 bilyon kada bulan kun ang palay mabakal sa P30 per kilo.
Sa pahayag ni Agriculture Secretary Francisco Tiu Laurel Jr., gin-aprubahan na sang NFA Council ang rekomendasyon sang pagbaligya sang NFA rice stocks sa P29 kada kilo pinaagi sa Kadiwa stores.
Sa idalom sang Bigas 29 program, ang vulnerable sectors kaangay sang persons with disabilities, solo parents, senior citizens kag indigenous people ang nalakip sa 6.9 milyon ka households, ukon masobra sa 34 milyon ka Filipinos ang makabenepisyo gikan sa P29 per kilo sang bugas.
