Nakaagom sang legal setback si Vice President Sara Duterte matapos ibasura sang Taguig City Prosecutor’s Office ang iya reklamo nga perjury batok sa iya ginapatihan nga anay aide nga si Ramil Madriaga bangud sa kakulangan sang ebidensya.
Ang desisyon sang Taguig prosecutors nagluntad isa ka adlaw matapos ibasura man sang mga prosecutor sa Quezon City ang reklamo nga ginpasaka ni Manases Carpio, asawa ni VP Sara Duterte, batok sa pila ka mga mambabatas kag opisyal sang Anti-Money Laundering Council ukon AMLC.
Gin-akusahan sila nga ilegal nga nagbunyag sang mga bank transactions nga may kaangtanan sa mag-asawa sa tion sang congressional hearing.
Suno sa Quezon City prosecutors, wala sila sang hurisdiksyon sa amo nga reklamo bangud ang mga ginreklamo mga public officials nga may Salary Grade 28 ukon mas mataas kag ginhimo nila ang mga gin-akusar nga aksyon bilang bahin sang ila opisyal nga katungdanan.
Sa 19-pahinang desisyon sang Taguig prosecutors, ginpahayag nga wala nakapakita sang igo nga ebidensya nga si Madriaga tinuyo kag hungod nga naghimo sang materyal nga sayop ukon bakak nga mga pahayag sa idalom sang panumpa.
Ini ang isa sa mga kinahanglanon para mapamatud-an ang paglapas sa Article 183 sang Revised Penal Code nga nagapatuhoy sa perjury.
