Nagtipon ang pila ka mga supporter ni Vice President Sara Duterte sa guwa sang Quezon City Hall sang Biyernes, antes ang iya pag-atubang sa arraignment sa tatlo ka kaso sang grave threats.
Nakatakda si VP Sara Duterte nga mag-atubang mismo sa Quezon City Regional Trial Court Branch 98 alas-8:30 sang aga.
Suno sa iya spokesperson nga si abogado Paolo Panelo Jr., kinahanglan personal nga magtambong ang bise presidente sa arraignment suno sa kasuguan.
Sa amo nga proseso, pormal nga ipahibalo kay VP Sara Duterte ang mga kaso batok sa iya kag hatagan sang kahigayunan nga magsulod sang plea nga guilty ukon not guilty.
Kon indi siya magsulod sang plea, ang korte ang magarehistro sang not guilty plea para sa iya bilang bahin sang standard nga proseso.
Ang mga kaso nag-ugat sa kontrobersyal nga pahayag ni VP Sara Duterte sang Nobyembre 2024, kun sa diin ginpahayag niya nga may gin-kontrata siya nga tawo agud ipapatay sanday President Ferdinand Marcos Jr., First Lady Liza Araneta-Marcos kag sadto nga House Speaker Martin Romualdez kon siya ang mapatay.
Sang Setyembre 4, ginpahimo sang korte ang pag-aresto kay VP Sara Duterte may kaangtanan sa mga kaso. Apang, nakapagpiyansa siya sang kabug-usan nga P360,000 sang masunod nga adlaw.
Ang amo nga pahayag ni Duterte nangin kabahin man sang isa sa mga Articles of Impeachment batok sa iya sa Senado.
Samtang, nagpalapit si VP Sara Duterte sa Supreme Court sang Huwebes agud pangayuon nga mapunggan ang Quezon City court sa pagpadayon sang kaso.
Ginargumento sang iya kampo nga may immunity from suit siya bilang isa ka nagapungko nga impeachable official.
