Nagpaandam ang Department of the Interior and Local Government (DILG) sa mga empleyado sang Bureau of Fire Protection (BFP) nga nalambigit sa ginatawag nga “slot for sale” nga modus, sa tunga sang nationwide recruitment para sa sobra duha ka libo ka bakante nga posisyon sa ahensya.
Kaupod sini ang nag-init nga kaso kon diin isa ka empleyado sang BFP nga may ranggo nga Senior Fire Officer 1 ang gin-akusahan nga nag-offer sang slot sa isa ka aplikante kabaylo sang ₱300,000.
Samtang, yara na sa kustodiya sang Criminal Investigation and Detection Group (CIDG) kag detained na ang suspetsado, kag ginpasakaan ini sang kaso nga robbery extortion.
Suno kay Interior Secretary Jonvic Remulla, seryoso ang ila kampanya sa paglimpyo sang ahensya batok sa iregularidad kag korapsyon, kag siguruhon nila nga manabat sa nagakaigo nga kaso ang bisan sin-o nga mapamatud-an nga nalambigit.
Dugang ni Remulla, ginaiimbestigahan na sang DILG ang sobra 200 ka empleyado, lakip ang pila ka regional directors nga ginadudahan nga nalambigit sa amo nga modus.
Ang ginakabig nga bayad sa kada transaksyon nagalab-ot halin ₱100,000 tubtob ₱800,000.
