Indi gulpi nga desisyon ang pag-atras sang House prosecution panel sa tatlo sa apat ka impeachment article batok kay Vice President Sara Duterte kag ang pagtuon na lamang sa isa ka alegasyon, suno kay Manila 3rd District Representative Joel Chua.
Suno kay Chua, madugay na nga kabahin sang ila ginatun-an nga mga estratehiya sa legal ang posibilidad nga bawi-on ang pila ka impeachment article, depende sa mangin dalagan sang paglilitis kag sa kabaskog sang mga ebidensiya kag testimonya nga mapresentar sa Senate impeachment court.
Paathag sang kongresista, halin pa sa umpisa nagpreparar na ang prosecution team sang nagkalain-lain nga posible nga tikang, lakip ang pagdugang ukon pagbuhin sang mga testigo kag ang pag-atras sa pila ka alegasyon kon bastante na ang mga ebidensiya nga ila napresentar.
Sang Martes, Oktubre 13, pormal nga gin-atras sang prosecution panel ang Articles I, III kag IV, nga may kaangtanan sa ginapahayag nga sayop nga paggamit sang confidential funds, panunuhol, grave threats kag pagpang-agda sa sedisyon.
Bangud sini, Article II na lamang, nga nagatalakay sa alegasyon sang unexplained wealth ukon manggad nga indi mapatin-aw ni Duterte, ang nabilin nga kaso nga kinahanglan sabton sang bise presidente sa atubangan sang mga senator-judge.
Dugang ni Chua, padayon nila nga gin-usisa ang ila presentasyon samtang nagapadayon ang paglilitis nga nagsugod sang Hulyo 6. Suno sa iya, nagadepende sa mga ebidensiya nga nalatag na ang ila desisyon kon kinahanglan pa magpresentar sang dugang nga mga testigo ukon ipadayon ang tanan nga alegasyon.
Apang, ginpat-od ni Chua nga bisan madugay na nila nga ginatalakay ang posibilidad nga paliiton ang sakop sang kaso, napinal lamang ang desisyon matapos makompleto sang prosecution team ang pinakabag-o nga pag-usisa sa ila mga ebidensiya.
