Ginkalipay sang isa ka traysikol driver sa syudad sang Koronadal ang pag-apruba sang ila ginpangabay nga pagpasaka sang plete, nga dako nga bulig sa ila pag-atubang sang nagadugang nga pang-adlaw-adlaw nga galastuhon.
Sa interview sang Bombo Radyo Koronadal kay Dante Tupaz, isa ka traysikol driver, ginpahayag niya ang iya pagpasalamat sa pag-apruba sang ila hangyo nga pasakaon ang plete, agud makabulig sa ila pangabuhian kag sa pagsabat sang nagkalain-lain nga kinahanglanon sa adlaw-adlaw.
Suno kay Tupaz, dako nga bulig sa ila nga mga traysikol driver ang dugang nga plete, bangud makadugang ini sa ila kinitaan sa tunga sang padayon nga pagtaas sang presyo sang mga kinahanglanon.
Apang, ginpabutyag man niya nga bisan pa gin-aprubahan na ang pagpasaka sang plete, kulang pa gihapon ini kun ikumpara sa nagataas nga presyo sang gatong nga isa sa ila mayor nga galastuhon sa pagbiyahe.
Gani, ginakabig niya nga importante ang pagpasaka sang plete agud mabuligan ang mga traysikol driver sa pagpadayon sang ila pangabuhian kag sa pagsabat sang nagataas nga gasto sa adlaw-adlaw.
