Gin-igihan ni Senator-Judge Joel Villanueva nga gusto niya gihapon mabatian ang panig sang depensa ni Vice President Sara Duterte sa impeachment trial, bisan pa gin-atras sang House prosecution panel ang tatlo sa apat ka impeachment article batok sa bise presidente.
Suno kay Villanueva, bilang isa ka senador-hukom, importante nga masiguro sang Senate Impeachment Court ang patas kag pareho nga pagtratar sa duha ka panig sa bug-os nga proseso sang paglilitis.
Paathag sang senador, daw may indi husto sa natabo bangod madugay nga ginpanghanda sang Kamara ang mga impeachment article kag ginpresentar pa ini sa Senado, antes gulpi nga nagdesisyon ang prosecution panel nga indi na pagpadayunon ang tatlo ka alegasyon.
Apang gin-athag ni Villanueva nga wala niya ginabasol ang prosecution panel sa ila desisyon. Suno sa iya, kinamatarong sang mga tagausig ang pagpili sang estratehiya nga ila pagagamiton, kag ginatahod niya ini nga tikang.
Dugang pa niya, dapat man mangin handa ang legal team ni Duterte sa estratehiya nga gamiton sang prosecution. Bisan pa sini, responsibilidad sang mga senador-hukom nga masiguro ang patas kag makatarunganon nga paglilitis, kag nga mabigyan sang pareho nga kahigayunan ang duha ka panig.
Suno kay Villanueva, usisaon pa sang korte kon pila ka oras ang igahatag sa depensa agud maipresentar sini ang ila panig kag sabat sa mga alegasyon.
Suno sa nauna nga anunsyo sang House prosecution panel, indi na nila pagpadayunon ang Articles I, III kag IV, nga may kaangtanan sa mga alegasyon sang sayop nga paggamit sang confidential funds, grave threats kag iban pa nga mga pasibangdan. Bangod sini, Article II na lamang ang nabilin nga impeachment article nga pagapadayonon sa paglilitis.
Samtang, nagsabat man si Villanueva sa mga pahayag halin sa kampo ni Duterte, lakip ang ginapahayag nga komento ni Atty. Paolo Panelo nga wala pa makig-angot ang mga senador-hukom sa depensa agud ipabalo ang ila pagkadismaya sa desisyon sang prosecution nga atrason ang tatlo ka artikulo.
Suno kay Villanueva, naipahayag na niya ang iya panindugan kag indi kinahanglan nga magpakita siya sang sobra nga reaksyon agud mapabutyag ang iya saloobin.
Ginpasanyog man niya nga kinahanglan magpadayon sa husto nga pamatasan ang mga senador-hukom kag dumdumon ang ila responsibilidad sa pagsiguro nga mangin patas ang paglilitis.
Gindasig man ni Villanueva ang publiko nga padayon nga bantayan kag usisaon ang mga ginahimo sang Senado, bangod importante sa demokrasya ang pagmonitor sang mga pumuluyo sa mga proseso kag desisyon sang gobyerno.
