Ginduso ni Senate Committee on Sports Chairman Sen. Bong Go ang padayon nga suporta sang gobyerno sa mga atletang Pilipino, lakip na ang paghatag sang patas nga insentibo sa mga para-athlete nga nagadaog sang medalya sa mga internasyonal nga kompetisyon.
Sa ginpatigayon nga budget hearing para sa sports sector, ginpabug-atan ni Go nga indi lamang dapat mabaton sang mga atleta ang suporta kon nakadaog na sila sang medalya, kundi kinahanglan man nga masiguro ang ila mga kinahanglanon sa tion sang training kag preparasyon.
Suno sa senador, dapat mahatagan ang mga atleta sang nagakaigo nga allowance, pamasahe kag iban pa nga kinahanglanon agud indi na sila mapilitan nga mangutang para lamang matustusan ang ila pagpanghanda sa mga kompetisyon.
Ginkilala man ni Go ang kontribusyon sang sports sa pagpalambo sang disiplina, pagkamainantuson kag teamwork sang mga pamatan-on, lakip na ang pagpalayo sa ila sa ilegal nga droga kag iban pa nga bisyo.
Samtang, gindayaw sang senador ang Philippine Sports Commission sa padayon nga pagsuporta sa mga atletang Pilipino nga nagrepresentar sa pungsod sa nagkalain-lain nga kompetisyon, lakip na ang 2026 Asian Games.
Nagpanawagan man siya sang bug-os nga suporta para sa mga atletang Pilipino nga magakompetensya sa 5th Asian Para Games nga natalana sa Oktubre 18 tubtob 24, lakip na ang paghatag sang patas nga insentibo sa mga para-athlete nga makakuha sang medalya.
Dugang pa ni Go, dapat mabatyagan sang mga atleta ang suporta sang gobyerno sa tagsa ka tikang sang ila pagpanghanda kag indi lamang kon nakab-ot na nila ang kadalag-an sa internasyonal nga entablado.
