Gindepensahan ni Manila Rep. Bienvenido “Benny” Abante Jr., ang confidential funds ni Presidente Ferdinand Marcos Jr., nga ginakabig nga importante bangud sa iya papel bilang Commander-in-Chief sang Armed Forces of the Philippines (AFP) kag panguna nga responsable sa national security.
Suno kay Rep. Abante, kinahanglan ang amo nga pondo bangud kabahin sa responsibilidad sang Presidente ang pag-atubang sa nagkalain-lain nga hulga sa seguridad sang pungsod.
Sa proposed P7.2-trilyon nga national budget para sa 2027, nagapangayo ang Office of the President sang P4.55 bilyon para sa confidential kag intelligence funds.
Ginpahayag ni Abante nga importante ang nasambit nga pondo agud masuportahan ang mga buluhaton sang Presidente sa pagproteher sang national security kag pag-atubang sa posible nga mga hulga sa pungsod.
Padayon naman nga pagasusisaon sang Kamara ang ginapangayo nga pondo bilang kabahin sang proseso sang pagtalakay sa 2027 national budget.
Subong nga adlaw, Lunes, Setyembre 1, nakatalana nga mag-atubang sa budget briefing sang House Appropriations Committee ang Office of the President.
