Ginsabat ni Department of Energy (DOE) Secretary Sharon Garin ang panawagan sang pila ka grupo nga mag-resign siya sa iya posisyon bangod sa ginapahayag nga kapabayaan ukon kakulangon sa pagtuman sang iya katungdanan sa tunga sang problema sa enerhiya.
Suno kay Garin, naintiendihan niya ang panawagan sang mga grupo bangud nagapakita lamang ini nga nagakabalaka ang publiko sa sitwasyon sang enerhiya sa pungsod.
Ginpahayag sang kalihim nga samtang yara siya sa iya posisyon, padayon niya nga tumanon ang iya katungdanan sa idalom sang pagsalig ni Presidente Ferdinand Marcos Jr.
Dugang pa niya, batunon kag respetuhon niya kun ano man ang mangin desisyon sang presidente parte sa iya pagpabilin sa puwesto.
Nagapati man si Garin nga maayo ang pagdumala sang ahensya kag ang ila pagsabat sa nagkalain-lain nga problema nga ginapangatubang sang sektor sang enerhiya.
Ginpaathag sang kalihim nga importante ang temprano nga pagplano sa sektor sang enerhiya bangod ang epekto sang mga tikang nga ginahimo subong mahimo pa mabatyagan pagligad sang lima ka tuig.
Gindugang pa niya nga madasig kag husto nga ginatuman sang DOE ang ila mga responsibilidad, ilabi na sa eksplorasyon sang mga suplay sang enerhiya, renewable energy, kag iban pa nga mga proyekto nga nagasuporta sa pagpauswag sang sektor sang enerhiya sa pungsod.
