Gin-akusaran ni Senador Alan Peter Cayetano si Senador Panfilo Lacson nga nagasunod lang sa ginamando sang administrasyon tunga sang ila binaisanay may kaangtanan sa flood control investigation kag impeachment trial ni Vice President Sara Duterte.
Suno kay Cayetano, ang mga tikang batok sa iya kabahin sang mas dako nga plano sang administrasyon kag may kaangtanan sa impeachment trial kag isyu sang charter change.
Gin-angkon man niya nga ginagamit lang si Lacson agud indi ang administrasyon ang mabasol sa sini nga mga isyu.
Ginpahayag pa ni Cayetano nga mas nakatutok si Lacson sa impeachment sang bise presidente sa baylo sa ginatawag niya nga flood control scam kag iban pa nga alegasyon sang korapsyon.
Sa pihak naman, ginsabat ni Lacson ang mga pahayag ni Cayetano kag ginbuksan ang alegasyon sang isa ka “ghost project” sa Taguig sang tion nga kongresista pa ini.
Suno kay Lacson, may mga testigo kag ebidensya nga mahimo magpasang-atan sang kaso batok kay Cayetano.
