Ginpahayag ni House Prosecutor Terry Ridon nga ipresentar sang House prosecution team ang mga opisyal sang Philippine Statistics Authority (PSA) bilang mga testigo sa impeachment trial batok kay Vice President Sara Duterte.
Katuyuan sini nga mapamatud-an ang alegasyon nga “fictitious” ukon hinimo-himo lamang ang pila ka mga indibidwal nga ginatudluan nga nakabaton sang confidential funds halin sa Office of the Vice President (OVP).
Suno kay Ridon, ang mga opisyal sang PSA amo ang nagpatigayon sang pagtuon kag nagpresentar sang resulta sini sa House inquiry.
Nahibaluan sa pagtuon nga ang mga ngalan nga makita sa acknowledgement receipts, pareho sang Mary Grace Piattos kag Milky Secuya, wala makita sa rekord sang PSA.
Suno pa sa iya, wala sang rekord nga ang mga ini nga natawo, nagpakasal ukon napatay sa Pilipinas.
Gani, ginapahayag sang prosecution nga posible nga peke ukon hinimo-himo lamang ang mga ngalan nga gin-gamit bilang recipients sang confidential funds.
Para sa prosecution, mahimo ini nga magpakita sang posible nga iregularidad ukon malain nga paggamit sang pondo sang gobyerno.
Samtang, sang Pebrero pa, ginpahayag na sang kampo ni Vice President Duterte nga prepardo sila nga ipaathag ang paggamit sang mga alias sa confidential funds, lakip na ang ngalan nga “Mary Grace Piattos.”
