Ginkwestyon ni Senator JV Ejercito ang mga pagbag-o nga ginhimo sang Kamara sa panukala nga national budget para sa 2027, matapos mag-abot sa ginabulubanta nga ₱206 bilyon ang mga pagbag-o sa orihinal nga budget proposal sang administrasyon nga nagabalor sang ₱7.2 trilyon.
Bilang chairman sang Senate Committee on Finance, nagpahayag sang kabalaka si Ejercito sa daku nga diperensya sa National Expenditure Program ukon NEP kag General Appropriations Bill ukon GAB nga gin-aprobahan sang Kamara, ilabi na sa mga pondo nga ginbuhin kag ginbalhin sa iban nga mga programa sang gobyerno.
Lakip sa mga ginbuhin ang ₱130 bilyon nga pondo para sa mga foreign-assisted project, nga nagalakip sang Metro Manila Subway kag North-South Commuter Railway. Ginbuhin man sang ₱9.5 bilyon ang calamity fund bisan pa sa hulga sang mabaskog nga El Niño.
Samtang ₱4.5 bilyon naman ang ginbuhin sa Health Facilities Enhancement Program kag ₱4 bilyon sa pondo para sa immunization ukon pagbakuna.
Sa pihak nga bahin, gindugangan sang ₱23.9 bilyon ang Medical Assistance Program. Sa Department of Public Works and Highways ukon DPWH, ginbuhin sang ₱2.6 bilyon ang pondo para sa right-of-way, apang gindugangan naman sang ₱13 bilyon ang mga proyekto nga may kaangtanan sa konstruksyon, maintenance, rehabilitasyon kag pagpalapad sang mga dalan.
Naminsar man ang senador sa paghatag sang ₱10 bilyon nga pondo para sa bag-o nga Presidential Assistance for Fisherfolk program kag dugang nga ₱8 bilyon para sa mga estruktura nga nagapugong ukon nagapamenos sang pagbaha. Apang, ginbuhin naman sang ₱4.6 bilyon ang pondo para sa mga flood mitigation project sa mga mayor nga river basin.
Ginkwestyon man ni Ejercito ang pagdaku sang pondo para sa mga programa sang ayuda, lakip ang Assistance to Individuals in Crisis Situations ukon AICS kag Tulong Panghanapbuhay sa Ating Disadvantaged/Displaced Workers ukon TUPAD, nga ginapaabot nga makabulig sa mga pumuluyo nga maapektuhan sang El Niño.
Sa tunga sang sini nga mga pagbag-o, ginpahayag sang senador ang importansya sang maid-id nga pag-usisa kon nagasanto bala sa mga prayoridad kag kinahanglanon sang pungsod ang mga pondo nga ginbuhin kag ginbalhin sa panukala nga national budget para sa 2027.
