Nagapati ang isa ka fruit vendor sa syudad sang Koronadal nga nagakabagay lamang kay Presidente Ferdinand “Bongbong” Marcos Jr. ang manubo nga rating bangod sa iya panan-aw, wala makita ang kaangay nga mga programa nga nagahatag sang daku nga benepisyo sa ordinaryo nga mga Pilipino.
Sa interview sang Bombo Radyo Koronadal kay Webie Bandiola, ginpahayag sini nga nagakaangay lamang ang manubo nga pagtimbang sa liderato sang presidente, ilabi na sa mga nagakatabo sa pungsod kag sa mga problema nga ginatubang sang mga pumuluyo.
Ginkwestyon man ni Bandiola ang isa ka proyekto sang administrasyon nga iya ginkomparar sa mga fire truck sa Koronadal City.
Suno sa iya, ang fire truck sa syudad nagabalor sang mga P5 milyon, samtang ang mas gamay nga unit nga kabahin sang proyekto sang presidente ginapahayag nga nagabalor sang P10 milyon.
Bangod sini, ginpahayag niya ang iya pagkadismaya kag ginakwestyon kon nagahatag bala sang nagakaigo nga benepisyo sa publiko ang amo nga mga proyekto.
Ginpanawagan man ni Bandiola sa administrasyon, ilabi na kay Presidente Marcos, nga hatagan sang mas daku nga atensyon ang kahimtangan sang ordinaryo nga mga Pilipino nga padayon nga nagabudlay sa pag-atubang sang pagsaka sang presyo sang mga balaklon kag panguna nga kinahanglanon.
Para sa iya, kinahanglan nga makita sang mga pumuluyo ang konkretong resulta sang mga programa sang gobyerno nga makabulig sa ila adlaw-adlaw nga pangabuhi.
