Nagtuga sang flash floods kag mudslides sa Santiago, ang kapital sang Chile, sang Huwebes, Oktubre 8 ang mabaskog nga ulan, nga nagresulta sa kahalitan sa propiedad, pagbakwit sang mga pumuluyo, kag pagkapilas sang indi magnubo sa anum ka tawo.
Suno sa mga report, ang Las Condes isa sa mga lugar nga naigo; ang naga-hagunos nga tubig kag lutak nga nag-ilig sa mga dalanon, nga nag-anod sang mga salakyan kag nagtuga sang pagbaha sa mga puluy-an kag mga pasilidad.
Ang pag-ulan sa Las Condes naglab-ot sa 14.4 sentimetros sang nagligad nga pila ka adlaw, halos siyam ka pilo sangsa kinaandan nga pag-ulan sa lugar para sa Oktubre.
Nagtuga ang grabe nga pagbaha sang pag-awas sang Mapocho River, nga nagtulod sa mga mando sa pagbakwit para sa mga komunidad nga yara sa katalagman.
Ginreport sang mga bombero nga kapin sa 1,000 ka tawo ang naluwas ukon gin-ibakwit.
Kalakip sa mga napilasan amo ang isa ka tuig nga bata nga nag-angkon sang fractures.
Nagdeklarar sang state of emergency ang Chilean President José Antonio Kast sa Las Condes agud mapadasig ang pagresponde sang gobyerno.
Nagpaguwa man sang red alert ang mga otoridad para sa napulo ka mga distrito bangud sa risgo sang dugang nga pagbaha kag pagtiphag sang duta, samtang ginpauntat ang klase sa mga apektado nga lugar.
Padayon ang rescue kag clearing operations sang mga otoridad samtang gina-assess ang kadakuon sang kahalitan.
Ginapanugyan sa mga pumuluyo nga likawan ang mga dalan nga ginabahaan, magsunod sa mga mando sa pagbakwit, kag magbantay sa opisyal nga mga pahibalo sa panahon.
