Ginpabutyag sang isa ka manunudlo sa syudad sang Koronadal nga bisan ginaselebrar na sang madamo ang Indigenous Peoples Month sa bulan sang Oktubre, nagapadayon gihapon ang diskriminasyon kag nagkalain-lain nga kabudlayan nga ginaeksperyensyahan sang mga miyembro sang Indigenous Peoples (IPs).
Sa interview sang Bombo Radyo Koronadal kay Adrian Pete Pregonir, isa ka manunudlo, iya ginpahayag nga importante ang pagkilala kag pagrespeto sa kultura kag tradisyon sang mga katutubo agud mas mapabaskog ang ila pagkakilanlan kag makahatag sa ila sang kahigayunan nga mangin kabahin sang mas malapad nga komunidad.
Ginpahinumdom man ni Pregonir ang tagsa ka pumuluyo nga dapat kilalahon kag tun-an ang kultura, tradisyon kag pagkakilanlan sang ila mga tupad-balay kag isigkatawo, ilabi na ang mga miyembro sang Indigenous Peoples, agud mapauswag ang paghangop kag pagrespeto sa tunga sang nagkalain-lain nga sektor.
Nagbilin man siya sang mensahe sa publiko nga padayon nga respetuhon ang kultura, duta kag identidad sang mga katutubo, kag likawan ang bisan ano nga porma sang diskriminasyon batok sa ila.
Dugang pa diri, ginpabutyag nga ang pagkilala sa mga katutubo indi lamang dapat ginahimo sa tion sang selebrasyon, kundi dapat mapakita man sa adlaw-adlaw nga pagpakig-angot sa ila bilang kabahin sang komunidad.
