Ginpahayag nga kinahanglan mapamatud-an ni President Ferdinand “Bongbong” Marcos Jr. ang iya panindugan nga mapapanabat ang tanan nga may kaangtanan sa ginapausisa nga mga anomalya sa flood control projects.
Ini ang nangin pahayag ni anay Surallah Mayor Atty. Antonio Bendita, sa interview sang Bombo Radyo Koronadal, nga dapat tindugan ni Marcos ang iya saad nga mapapanabat ang tanan nga may kaangtanan sa kurapsyon kag mapakita nga wala siya ginapaboran ukon ginaprotektahan nga bisan sin-o nga imbolbado sa amo nga mga alegasyon.
Suno kay Bendita, ang pagpasaka sang kaso batok sa mga responsable kag ang pagpatuman sang patas nga proseso amo ang magapakita sang kabakod sang panindugan sang administrasyon kontra korapsyon.
Sa pihak nga bahin, gdayaw man ni Bendita ang mga tikang nga ginahimo ni Marcos may kaangtanan sa ekonomiya sang pungsod kag ang mga paninguha para sa pag-uswag kag pagpalig-on sang kahimtangan sang Pilipinas.
Gindugang pa niya nga ginakilala niya ang pagdepensa sang administrasyon sa soberanya sang pungsod, ilabi na sa mga isyu nga may kaangtanan sa relasyon kag tensyon sa iban nga pungsod, partikularmente ang China.
Ginpanawagan man ni Bendita sa mga pulitiko kag opisyal sang gobyerno nga tumanon sing husto ang ila mga responsibilidad para sa kaayuhan sang mga pumuluyo kag magserbisyo sing matarong kag matinud-anon.
