Ginpaathag sang Commission on Elections (COMELEC) nga ginpahunong na ang mga preparasyon para sa 2026 Barangay kag Sangguniang Kabataan Elections (BSKE) matapos mapirmahan ni President Ferdinand Marcos Jr. ang Republic Act No. 12326, nga nag-postpone sang eleksyon nga dapat tani himuon sa Nobyembre 2, 2026. Ang bag-o nga schedule amo ang ikaduha nga Lunes sang Nobyembre 2028.
Sa interview sang Bombo Radyo Koronadal kay Atty. Jay Gerada, Provincial Election Supervisor sang COMELEC, iya ginpahayag nga mahimo gihapon magamit sa masunod nga eleksyon ang mga election materials nga na-preparar na.
Suno man sa COMELEC, ang mga na-print ukon na-procure na nga election forms, supplies kag paraphernalia dapat ma-secure, ma-store sing husto, kag ma-preserve para sa future use.
May pila man ka preparasyon nga padayonon, kasubong sang pagkompleto sang printing sang dugang nga ballots kag forms kag pag-deliver sang mga pending nga supplies.
Importante man suno sa iya nga bangud sa postponed na ang 2026 BSKE, nagabag-o ang proseso kag schedule sang voter registration.
Ang COMELEC nagasiling nga ang voter registration para sa 2028 National and Local Elections magapadayon umpisa sa ikaduha nga semana sang Nobyembre 2026.
