Nagapanawagan sang bulig kag klaripikasyon sa Department of Migrant Workers (DMW) ang pamilya sang isa ka OFW nga napatay sa Riyadh, Saudi Arabia, matapos kapin duha ka bulan nga wala pa nila mabaton ang ginapaabot nga benepisyo kag financial assistance.
Sa interview sang Bombo Radyo Koronadal ginpahayag ni Azia Sausa, utod sang napatay nga OFW nga ginkilala kay Mary Garcia Sausa, nakabaton sila sang impormasyon halin sa mga kaupod sang iya utod nga nalipong ini kag gindala sa balay bulolngan. Apang pagka-sunod nga adlaw, ginpahibalo sila nga napatay na ini.
Ginpauli sa Pilipinas ang bangkay kag ginlubong sa Carmen, North Cotabato. Para sa gastos sa paglubong nga naglab-ot sa kapin P35,000, napilitan ang amay nga si Romulo Sausa nga mangutang.
Suno sa pamilya, may yara pa sang wala mabayran nga isa ka bulan nga sweldo kag may assistance man ginaalegar halin sa employer ukon agency, apang wala pa ini nila nabaton.
Nagkadto na ang pamilya sa DMW sa Koronadal kag nagpasa sang mga dokumento bilang beneficiaries. Ginpahayag sa ila nga wala pa sang pondo kag hulaton na lamang ang tawag sang ahensya.
Tubtob subong, wala pa sila nakabaton sang update. Gani, nagapangayo si Romulo sa DMW sang bulig sa pagproseso kag pag-release sang mga benepisyo ukon assistance nga kwalipikado ang ila pamilya nga mabaton.
Samtang nagadaku ang ila kabudlayan bangod ginapangayo na sang ila mga gin-utangan ang bayad para sa gastos sa paglubong. Nagapangayo ang pamilya sang klaripikasyon sa DMW kag concerned agency sa status sang ila aplikasyon kag kon san-o posible ma-release ang benepisyo ukon financial assistance.
