Nagapadayon ang pagmonitor sang Land Transportation Franchising and Regulatory Board ukon LTFRB-12 sa mga reklamo tuhoy sa mga driver nga nagapanukot sang sobra sa ginapatuman nga pamasahe.
Sa interview sang Bombo Radyo Koronadal kay LTFRB-12 Regional Director Atty. Pablito Benedian Jr., may ginapatigayon na nga mga tikang ang ahensya agud mahibaluan kag mapanabat ang mga driver nga nagalapas sa fare rates, lakip na diri ang “Criminal Inspection” kag “Road Inspection.”
Apang, gin-ako ni Benedian nga indi posible nga mabusisi sang LTFRB-12 ang tagsa-tagsa ka dalan, ilabi na sa syudad sang Koronadal. Gani, gin-engganyo niya ang publiko nga i-report sa ila talatapan ang mga driver nga nagapanukot sang sobra nga pamasahe.
Suno pa kay Benedian, nagasugod sa P5,000 ang penalidad para sa mga driver nga mapamatud-an nga naglapas sa fare rates. Samtang ang mas seryoso nga paglapas mahimo magresulta sa mas mabug-at nga silot, lakip na ang revocation sang prangkisa.
