Ginpabutyag sang LTFRB-12 nga provisional ukon temporaryo lamang ang kasamtangan nga fare hike nga ginpatuman kasunod sang pagsaka sang presyo sang gatong.
Sa interview sang Bombo Radyo Koronadal kay LTFRB-12 Regional Director Atty. Pablito Benedian Jr., gin-approbahan ang provisional fare hike bangud sa nagabag-o nga presyo sang gatong kag mahimo ini nga repasuhon depende sa kahimtangan sang presyo sa merkado.//Suno kay Benedian, kun magnubo ang presyo sang gatong, mahimo man nga panubo-an ang provisional fare hike.
Kun magbalik naman sa normal ang presyo sang gatong, mahimo man nga magbalik sa normal ang fare matrix.
Dugang pa niya, bukas ang LTFRB-12 sa pagbaton kag pagkonsiderar sang mga petition para sa fare reduction nga mahimo ipasaka sang consumer groups ukon mga grupo sang riding public.
Apang, ginpahayag ni Benedian nga indi ang regional office ang may katungdanan nga magdesisyon ukon magregulate sang fare matrix. Ang amo nga awtoridad yara sa LTFRB Board.
Suno sa iya, ang mahimo lamang sang regional office amo ang pagkuha sang mga datos kag impormasyon halin sa publiko, paghimo sang rekomendasyon kag pagpresentar sini sa Board para sa pag-usisa kag pag-aprobahan.
