Nagbalos si House Prosecutor Terry Ridon sa mga pahayag sang kampo depensa ni Vice President Sara Duterte nga nagasiling nga nagasalig lamang ang mga mambabatas nga miyembro sang prosecution panel sa mga pribado nga abogado sa pagdumala sang impeachment case batok sa Bise Presidente.
Naghalin ang isyu matapos magreklamo ang defense team sa malawig nga pagpadayon sang pre-trial conference nga nagsugod pa sang nagligad nga semana. Suno kay Mark Vinluan, nagatambong lamang sa aga ang mga public prosecutor kag nagaguwa man sa ulihi, nga nagabilin sang kadam-an nga trabaho sa mga private prosecutor.
Apang ginpakamatarung ni Ridon ang akusasyon kag ginpahayag nga aktibo nga nagapartisipar ang mga public prosecutor sa tagsa ka sesyon sang pre-trial conference kag sa tanan nga mga proseso nga kinahanglan matapos antes makasugod ang pormal nga paglilitis.
Ginpunto pa niya nga sa sulod sang tatlo ka adlaw nga pre-trial conference, personal siya nga nagtambong tubtob matapos ang mga sesyon, bilang pagpamatuod nga padayon ang ila pagtrabaho para mapadasig ang proseso.
Ginklaro man ni Ridon nga indi kakulangan sang tawo ukon manpower ang nagapahinay sa pre-trial proceedings. Suno sa iya, ang daku nga hagit amo ang madamo nga mga dokumento kag pahina nga kinahanglan usisahon, markahan kag pirmahan sang duha ka kampo antes ini mahimo nga gamiton sa paglilitis.
Sa subong, padayon ang pagmarka kag pag-organisar sang documentary evidence sang prosecution kag defense teams. Suno kay Ridon, mga 50 porsyento na ang natapos nga trabaho sa pagproseso sang mga ebidensya, kag nagalaum siya nga matapos ini sa pinakamadasig nga tion agud makasugod na ang impeachment trial.
Ang palapit nga pagsugod sang paglilitis ginatulok sang madamo nga sektor sang publiko, nga nagaabang sang mas klaro nga pag-usisa sa mga alegasyon batok kay Vice President Duterte kag sa mga depensa nga ipresentar sang iya kampo.
