Ibinalik ni Interior Secretary Jonvic Remulla ang P28,011 na ginastos ni Reina Mercedes, Isabela Vice Mayor Harold Respicio para sa drug test matapos ang hamon ng kalihim na sumailalim siya sa pagsusuri.
Nauna nang humiling si Respicio kay Remulla na i-refund ang kabuuang halaga ng kanyang drug test. Ipinost din ng bise alkalde sa Facebook ang QR code na maaaring gamitin para sa pagbabayad ng naturang halaga.
Sa comment section ng post, kinumpirma ni Remulla na naibalik na niya ang P28,011 at nagpakita ng screenshot ng transaksiyon bilang patunay na naisagawa na ang refund.
Ang drug test ay isinagawa matapos ang palitan ng pahayag nina Remulla at Respicio kaugnay ng mga alegasyon na may kinalaman sa ilegal na droga.
Naging bahagi rin ng kanilang pagtatalo ang kaguluhan sa isang sesyon sa Reina Mercedes, Isabela na pinangunahan ni Respicio bilang bise alkalde.
Ang refund ay isinagawa kasunod ng hiling ni Respicio matapos nitong tuparin ang hamon na sumailalim sa drug test.
