Ginpahayag sang House prosecution panel sa Senate Impeachment Court ang testimonya ni AMLC Executive Director Ronel Buenaventura bilang kabahin sang ila ebidensya sa impeachment case batok kay Vice President Sara Duterte.
Suno sa private prosecutor nga si Atty. Mae Divinagracia, nagpakita ang mga rekord sang AMLC nga may ginabulubanta P319 milyon nga remittances halin sa mga kumpanya sa China nga nagsulod sa Cale88 Foods Corporation, diin may ginapatihan nga 47.5 porsyento nga business interest si Atty. Manases Carpio, bana ni Duterte.
Suno sa prosekusyon, tatlo sa mga remittance ang gin-report sang bangko bilang suspicious transactions bangod wala kuno sang klaro nga legal ukon trade obligation kag economic purpose.
Ginpahayag man sang prosekusyon nga halos P4.5 bilyon ang nag-agi nga pondo sa 15 ka korporasyon nga may ginapatihan nga interes sanday Duterte kag Carpio halin 2022 tubtob 2025.
Dugang pa sini, gin-estimar sang prosekusyon sa P4.4 bilyon ang kabug-usan nga covered kag suspicious transactions nga direkta suno pa nga nagadalahig sa mag-asawa halin 2007 tubtob 2025.
Suno sa prosekusyon, gamiton ang mga rekord sang AMLC bilang ebidensya sa pagsuporta sang mga alegasyon sa Article II sang impeachment complaint batok kay Duterte.
