KORONADAL CITY – Proud kag malipayon ang mga pinoy nga yara sa pungsod France bangud sa duha ka bulawan nga medalya nga nakuha ni Carlos Yulo sa patag sang gymnastics.
Sa interview sang Bombo Radyo Koronadal kay Ms. Yeng Dormile, BINC to France, ginpahayag sini nga dako nga bugal kag kadalag-an para ila nga mga pinoy ang nakab-ot sang nasambit nga pinoy sa patag sang gymnastics kag mas nagtaas pagid ang ila nga dungog sang ginpatukar na ang national anthem sang Pilipinas nga amu naman nga Lupang Hinirang.
Madumduman nga liwat nga nasungkit sang Pinoy gymnast nga si Carlos Yulo ang bulawan nga medalya matapos nakakuha sang pinakamataas nga score sa Men’s Vault Finals.
Nakatipon sang 15.166 nga score si Yulo pagkatapos sang iya duha ka performances, nga amo ang pinakamataas nga score bisan nga may apat pa ka nabilin nga ma-perform.
Sa maayo nga palad, wala natupungan sang nabilin nga gymnasts ang score ni Yulo. Nagpangaduha ang pambato sang Armenia nga may 14.966, samtang Bronze naman ang nakuha sang taga Great Britain nga si Harry Hepworth.
Naghimo sang kasaysayan si Yulo bilang pinakauna nga double Olympic Gold medalist. Una ini nga nagdaog sang bulawan sa Men’s Artistic Gymnastics Floor Exercise sang Sabado.
