Ginapaabot nga mag-atubang mismo sa Sandiganbayan bilang testigo sang iya kaugalingon nga depensa si Leyte Representative Martin Romualdez sa P7.44-bilyon nga plunder case batok sa iya.
Suno sa iya abogado nga si Atty. Ade Fajardo, luyag ni Romualdez nga personal nga depensahan ang iya kaugalingon matapos pormal nga gintapos sang Sandiganbayan Third Division ang pre-trial proceedings.//Mahimo man nga ipresentar sang depensa ang pila ka security aide kag driver sang co-accused nga si anay Ako Bicol Representative Zaldy Co, lakip si Orly Guteza nga ginasiling nga nagbawi sang iya nauna nga testimonya.
Suno kay Fajardo, ginpahayag ni Guteza sa iya bag-o nga ginsumpaan nga salaysay nga ang iya nauna nga pahayag kabahin kuno sang isa ka setup.
Ginabulubanta nga yara sa 40 ang posible nga testigo sang depensa, apang mahimo pa ini magbag-o depende sa mga ebidensya nga ipresentar sang prosekusyon.
Nagapabilin nga detained si Romualdez sa Quezon City Jail–Male Dormitory sa Payatas, samtang at large pa ang iya tatlo ka co-accused, lakip si Co.
Samtang, ginpahanumdom sang Sandiganbayan ang abogado ni Romualdez nga si Judd Roy nga ang pagbasa sang information sa arraignment isa ka regular nga bahin sang proseso agud masiguro nga nahibaluan sang akusado ang mga kaso batok sa iya.
