KORONADAL CITY – Hingyo sa karon sang pamilya ni Bombo Bart Maravilla, isa sa 58 biktima ng Ampatuan massacre nga maaresto na ukon madakpan ang masobra 40 ka mga at-large nga suspek agud nga makab-ot na nila ang “full justice” sa pagkapatay sini.
Ini ang ginpahayag ni Janchiene Maravilla, bata ni Bombo Bart sa eksklusibo nga interview sang Bombo Radyo Koronadal.
Suno kay Janchine, apisar nga 13 ka tuig na ang nakialigad, daw kasubong nga kahapon lamang nagluntad ang masaker kag halos indi sa gihapon nila malipatan ang natabo.
Sa subong, ginakabig nila nga “partial justice” sa gihapon ang naangkon sang ila nga amay bangud sa may mga myembro sa gihapon sang political clan nga Ampatuan nga hilway kag yara pa sa gahum.
Subo pa ka Maravilla, hingyo nila sa Marcos administration nga kuntani indi malipatan ang natabo sa 58 nga nagbuwis sang kabuhi bangud sa pagkagahaman sa pulitika sang makagagahum nga pamilya.
Subong nga adlaw kadungan sang ika-13 anibersaryo sang Ampatuan Massacre, pagabisitahon sang pila ka mga pamilya ang massacre site agud maghalad sang pangamuyo, bulak kag magsindi sang kandila sa grave site kun diin nakutkutan ang bangkay sang mga biktima lakip na ang 32 ka mga katapu sang media.
May ipatigayon naman nga mga aktibidad sa Forest Lake cemetery sa siyudad sang General Santos kun diin nakalubong ang iban nga mga biktima.
Samtang, una na nga ginbisita sang pamilya Maravilla ang lulobngan ni Bombo Bart sa Koronadal Eternal Garden sa siyudad sang Koronadal sang tinalikdan nga semana sa kadungan sang kaadlawan sini.
