Ginakabig sang Rank 7 topnotcher sang September 2026 Registered Psychometrician Licensure Examination halin sa Notre Dame of Marbel University nga dako nga bahin sang iya kadalag-an ang suporta sang iya pamilya kag mga abyan.
Sa interview sang Bombo Radyo Koronadal kay Santiago L. Gasmin, RPm, iya ginpahayag nga dako ang iya pasalamat sa iya pamilya nga padayon nga nagsuporta sa iya sa bug-os nga proseso sang pag-eskwela kag pag-review.
Suno kay Gasmin, ginalauman na niya, kaupod sang iya pamilya kag mga kaklase, nga malakip ang iya ngalan sa listahan sang mga passer kag topnotcher bangud ginpangabudlayan niya ang eksaminasyon.
Agud makapokus sa iya pagtuon, madamo man sang mga kasadyahan kag lagaw ang iya ginpaiway kag ginpili nga unahon ang pag-review.
Apang para kay Gasmin, indi dako nga sakripisyo ang pagtalikod anay sa mga kalipayan bangud mas dako ang balos sini matapos niya mapasar ang eksaminasyon kag makakuha sang ika-pito nga ranggo.
Sa pihak sini, naghatag man siya sang mensahe sa mga estudyante nga luyag magpursige sa psychology nga magpadayon sa pagtuon kag magpabilin nga determinado sa pagkab-ot sang ila mga handum.
Gindugang niya nga indi lamang dapat magtinguha nga makapasar, kundi gamiton man ang ihibalo kag propesyon bilang instrumento sa pagbulig sa mga tawo, ilabi na sa sini nga tion nga nagadamo ang mga isyu nga may kaangtanan sa mental health.
