Nakabaton sang P20k nga pinansyal nga assistance ang mga miyembro sang armado nga grupo nga nagdesisyon nga magsungka kag magbalik-loob sa gobyerno sa South Cotabato.
Sa interview sang Bombo Radyo Koronadal kay Provincial Social Welfare and Development Officer Sonia L. Bautista, RSW, MPA, MTRM, ginpahayag niya nga ginahatagan sang South Cotabato Provincial Government sang P20k nga bulig ang mga nagsungka bilang kabahin sang programa para sa ila pagbalik sa komunidad.
Suno kay Bautista, indi lamang pinansyal nga assistance ang ginahatag sang probinsya.
Kabahin man sang suporta ang pagbulig sa ila reintegration ukon pagbalik sa normal nga pagpangabuhi pinaagi sa mga programa sa deradicalization.
Ginapatuman ini sa koordinasyon sang nagkalain-lain nga partner agencies, lakip ang Department of Social Welfare and Development ukon DSWD, Technical Education and Skills Development Authority ukon TESDA, militar, kag ang komunidad.
Tumong sini nga mabuligan ang mga nagsungka nga makabalik sa ila mga pamilya kag komunidad kag makapagsugod sang malinong kag mas maayo nga kabuhi.
