“Mas nami tani nga madayon kay nagahulat ang mga tawo.”
Ini ang nangin pahayag ni Jimmy Lamberto, isa ka tricycle driver, sa interview sang Bombo Radyo Koronadal.
Nagpahayag sang pagkadismaya si Tatay Jimmy may kaangtanan sa pagpa-iway sang 2026 Barangay kag Sangguniang Kabataan Elections (BSKE).
Suno kay Lamberto, mas maayo tani nga madayon ang eleksyon bangud madamo na sa mga katawhan ang nagahulat kag nagalaum nga makapili sang ila mga lider sa tagsa-tagsa nila ka barangay.
Ginpahayag man ni Lamberto nga medyo nadismaya siya matapos pirmahan ang bag-o nga layi nga nagapa-iway sang eleksyon.
Para sa iya, ang pagpadayon sang eleksyon magahatag kuntani sa mga botante sang kahigayunan nga makapili sang mga lider nga ila gusto magserbisyo sa komunidad.
Samtang, bangud sa bag-o nga layi, indi na pagahiwaton ang BSKE nga nakatakda kuntani sa 2026 kag ang sunod nga regular nga eleksyon pagahiwaton na sa Nobyembre 2028.
