Nag-abot sa walo ka dump trucks ang nakolekta nga basura matapos ang selebrasyon sang T’nalak Festival 2026 kag Founding Anniversary sang South Cotabato.
Suno kay South Cotabato Governor Reynaldo Tamayo Jr., bisan may mga trash bins nga ginbutang sa nagkalain-lain nga bahin sang festival grounds, madamo gihapon sang basura ang nabilin, ilabi na pagkatapos sang mga aktibidad sang nagligad nga Domingo.
Bangud sini, ginpasalamatan sang gobernador ang mga personnel sang Provincial Environment Management Office (PENRO) kag iban pa nga mga grupo nga nagbulig sa pagpaninlo sang venue.
Ginpahayag man niya nga padayon ang kapitolyo sa pagdeploy sang mga personnel nga nagapanglimpyo pagkatapos sang kada programa agud mapabilin nga matinlo ang festival grounds.
Dugang pa ni Tamayo, bisan indi perpekto ang sitwasyon, nalipay siya nga madamo sang mga bisita ang nakapansin nga mas matinlo ang festival grounds subong kumpara sa nagligad nga mga selebrasyon.
Ginpangabay man niya ang publiko nga magtinir kag maglabay sang basura sa nagakaigo nga basurahan agud mapabilin ang kalimpyo sang palibot.
